Napanubo sa 12,000 nga mga konsumedor nga maapektuhan sang 12 hours scheduled maintenance sang Negros Electric and Power Corporation (NGCP) bwas, bangod sa patigayunon nga mga switching kag pag-transfer sang load sa mga feeder.
Sa interview sang Bombo Radyo Bacolod kay Engr. Leomel Tambanillo, Assistant Vice President for Business Planning and Operation sang Negros Power, ang scheduled maintenance ang kabahin sa 5-year rehabilitation kag modernization plan.
Natalana ang alas-6:00 sang aga tubtob alas-6:00 sang gab-i nga power interruption bwas sa bilog nga Mountain View Feeder 1, 5 kag 6, kasubong man ang porsyon sang Mountain View Feeder 2, 3 kag 4.
Suno kay Tambanillo, malapit sa 21,000 ang kuntani apektado, apang ang numero ang napanubo bangod ang iban nga load ang itransfer sa iban nga feeder.
Bangod sini, may pila ka lugar nga makaeksperyensya lamang sang duha ka oras nga power interruptions nga ginalakipan sang alas-6:00 tubtob alas-7:00 sang aga kag alas-5:00 sang hapon tubtob alas-6:00 sang gab-i.
Ang apektado ang ginalakipan sang porsyon sang Burgos Feeder 2; kasubong man sa porsyon sang Mountain View Feeder 2 kag 3.
Samtang halin alas-6:00 tubtob alas-7:00 sang aga; kag alas-12:00 sang udto tubtob alas-6:00 sang gab-i sa bilog nga Mountain View Feeder 4.
Suno kay Tambanillo, ang mga scheduled power interruptions ang bangod sa pag-ilis sang Mountain View substation transformer 1 kag 2; pag-ilis sang 69kV power circuit breaker para sa 20/25MVA power transformer; reconfiguration sang 69kV line para ma-offset ang vertical clearance sang bag-o nga distribution construction-primary line; kasubong man ang pagbukas sang bag-o nga Mountain View Feeder 7.
Nagapasalamat ang mga ini sa paghangop sang mga konsumedor, kag nagapati man sila nga nabatyagan na ang improvement sa serbisyo sang Negros Power bangod sa mga rehabilitation.
Liwat ang mga ini nga nagapangayo sang pasaylo sa panibag-o nga power interruptions.
Ini ang paghingagaw naman agud mapreparahan ang amat-amat nga nagalala nga kainiton sa summer season.
