BACOLOD CITY — Indi na mag-file sang Motion for Reconsideration (MR) si Engr. Mario Macatangay batok sa desisyon sang Civil Service Commission (CSC) nga naga-reinstate kay Atty. Juliana Carbon bilang general manager sang Bacolod City Water District.
Sa interview sang Bombo Radyo, ginpahayag ni Macatangay, nga amo karon ang nagapungko sa nasambit nga posisyon, gin-aku sini nga nagkonsulta siya sa iya nga abogado bangud wala ini nakahibalo kun ano ang iya nga himuon angot sa reinstatement ni Carbon.
Apang suno kay Engr. Macatangay, wala man siya sang bahin sa amo nga desisyon sang Civil Service Commission bangud ginapatungod ini sa Board of Directors kag kay Atty. Carbon.
Pananglitan wala na siya sang may mahimo, suno kay Macatangay, handa man ini nga magbiya sa posisyon.
Nahibaluan nga ang CSC decision nagasiling nga i-reinstate si Atty. Carbon, bayaran ini sang iya nga backwages kag subong man, gina-invalidate ang pagbutang sang Board kay Macatangay bilang general manager.
