Patay ang mag asawa matapos ginluthang samtang nagapapuli sa Purok Cesco,Barangay Rafaela, syudad sang Sagay kagab-i.
Ginkilala ang mga biktima kanday Hanna Grace kag Norberto Bukaling samtang ginkilala ang suspetsado nga si alyas Niño Andrin.
Sa interview sang Bombo Radyo Bacolod kay Police Major Roberto Indiape Jr., hepe sa Sagay City Police Station, ginsundan papuli sang suspetsado ang mag asawa nagikan sa syudad sang Escalante.
Pag abot sa lugar, ginbungguan ni Andrin ang motorsiklo sang mga biktima rason nga natumba ang mga ini kag didto na sini ginluthang ang mag-asawa.
Suno kay Indiape, ginalantaw nga ginhungod sang suspetsado nga bungguan ang motorsiklo sang biktima agud matumba kag mahimo ang krimen.
Ginkumpirmar man ni Indiape nga upod sang mag-asawa ang ila bata nga apat ka tuig nga wala sang naagom nga samad kag ini ang yara sa karun sa kustodiya sang lola.
Nadakpan naman si Andrin sa iya nga balay kasunod sang ginpatigayon nga hot pursuit operation.
Nakahunong na sa custodial facility sang Sagay City Police Station si Andrin kag natalana ipaidalom sa parrafin test.
Samtang, pagpangimon naman ang ginalantaw nga motibo sang krimen.
