Ginadihon na nga mahatagan sang reward ang mga magaserbe nga witness sa mga kaso nga may kabudlayan sa pagsolbar sa ciudad sang Bacolod.
Sa interview sang Bombo Radyo Bacolod kay Police Col. Joeresty Coronica, ini ang isa sa iya nga ginpangabay kay Bacolod City Mayor Alfredo ‘Albee’ Benitez sang ini ang nagpungko bilang panibag-o nga Bacolod City Police Office (BCPO) Director, nga gin-ugyunan man sang alkalde.
Suno diri, P20,000 ang minimum nga mahatag sa mangin witness samtang P50,000 naman ang maximum.
Sa tion nga masobra sa isa ang witness, ang kantidad ang ila na lamang nga tulungaon.
Sila ang magatukod man sang komitiba kun sa diin si Coronica ang magatindog nga chairperson, samtang malakip man diri ang duha ka deputy, legal officer kag ang mga pinuno sang quad staff nga ginalakipan sang Intelligence, operation, community affairs kag investigation and detective management.
Sa komitiba ideterminar kun pila ang reward nga ihatag sa magaserbe nga witness depende sa kadalumon ukon kabug-aton sang kaso.
Tun-an man nila ang mga unsolved crimes sa Bacolod City humalin Enero tubtob Hulyo, kag mga palaabuton pa nga mga mabug-at nga kaso.
Ini ang ginalantaw nila nga paagi nga makabulig sa pagsolbar sang kaso sa mga tion nga sila ang blangko ukon wala gid sang makita nga lead.
