Nagsaka na sa duha ang patay sa pagpalupok sang mister sang granada matapos ang pag-away nila sang iya live-in partner sa ciudad sang Cadiz.
Sa interview sang Bombo Radyo kay Police Major Robert Mansueto, hepe sang Cadiz City Police Station, nag-away sanday Boyet Celiz kag ang 22-anyos nga si Leslie Prudente sa ila nga balay sa Purok Paradise, Barangay Cabahug sang Mayo 10 sang gab-i.
Gilayon nga ginpalupok ni Celiz ang wala pa natumod nga sahi sang granada nga nagresulta sa iya kamatayon samtang nag-angkon naman sang malubha nga pilas si Prudente.
Kaina sang kaagahon, ginbawian naman sang kabuhi ang babayi.
Suno sa mga himata sang maglive-in partner, makapila na ka beses nga nagapamahog si Celiz nga mapalupok ini sang granada sa tion nga sila ang mag-away ni Prudente kag iya gid gintuman sang tinalikdan nga gab-i.
Sa karon, ginatumod pa sang mga pulis kun paano nakapanag-iya sang granada si Celiz.
