Magluwas sa panawagan sa pag-amlig sa mga mamumugon subong nga Labor Day, ginpanawagan man sang anti-Communist group ang pagpakigbato sa mga makawala nga grupo sa ginpatigayon nga rally sa Bacolod Public Plaza.
Sa interview sang Bombo Radyo Bacolod kay Sentrong Alyansa ng Mamamayan Para Sa Bayan (SAMBAYANAN) – Negros Coordinator Alejandro Bañare, ginakontra kag ginapakalain sang Communist Party if the Philippines – New People’s Army – National Democratic Front (CPP-NPA-NDF) ang mga union sang mga mamumugon.
Ini bangod luyag sang mga rebelde nga sila ang tumbahon kag maguba ang gobyerno sa tinutuyo nga magtukod sang komunista nga sahi sang panggobyerno.
Sa programa, ginsunog sang SAMBAYANAN ang flag sang CPP-NPA-NDF, kag ginpanindugan ni Bañare nga indi dapat iselebrar ang anibersaryo sa pagtukod sang rebelde nga grupo.
Ang panawagan ang nag-ugat man sa mga naglutad nga engkwentro sa probinsya.
Suno diri, wala gid sang tarong nga nahimpo ang makawala nga grupo kag madamo na sang napukan nga kabuhi bangod sa sala nga pagpakigbato kalakip na ang mga militar kag sibilyan.
Hugot nila nga ginapamatukan ang recruitment sang NPA, partikular na sa mga pamatan-on.
Suno kay Bañare, ang mga makonsiderar terorista nga grupo ang nagapangilkil, nagapangbomba kag nagapanunog sang mga propedad sang pila ka mangunguma, negosyante kag gobyerno.
