Arestado ang apat ka mga persona matapos nga makuhaan sang kinarton sang illicit cigarettes sa baybayon sang Barangay 2, Ilog, Negros Occidental.
Ginkilala ang mga arestado nga sanday Junior Mahalial, 31 anyos, kasado, construction worker, Plong Ibnain, 18 anyos, single, mangingisda, Soji Tony, 19 anyos, kasado kag Azwan Mohamad, Malaysian, 20 anyos, kasado kag lunsay mga residente sang Brgy Diki, Isabela City, Basilan.
Nagdangat sa 155 ka mga box ukon 7,750 ka reams sang illicit nga sigarilyo ang nakumpiskar sang mga otoridad.
Sa interview sang Bombo Radyo Bacolod kay Police Major Joseph Partidas, Chief of Police sang Ilog Municipal Police Station, antes pa man ang ginpatigayon nga joint operation kaupod ang miyembro sang Philippine Coast Guard nga ginpangunahan ni Lt. Junior Grade Carla M. De Guzman kag miyembro ang Bureau of Internal Revenue RDO 78, Binalbagan, Negros Occidental nga ginpangunahan ni Reynaldo A. Omandas Jr, Group Supervisor, may yara na sila sang nabaton nga impormasyon nga may yara sang nagahimo sang illegal nga transaction sa baybayon sang Ilog kun sa diin ginaship ang mga sigarilyo nga wala ginbayadan ang buwis.
Suno kay Partidas, ang illegal goods ang ginakuha sa baybayon sang banwa kag ginadala sa iban nga local government unit kaangay sang ciudad sang Himamaylan kag Kabankalan.
Suno diri, nangin madinalag-on naman ang ginpatigayon nga monitoring sang mga otoridad kun sa diin naaresto ang apat.
Nakalab-ot ang apat sa Ilog, Negros Occidental matapos nga ini ang nagbiyahe gikan sa Zamboanga sakay sa bangka sa sulod sang duha ka adlaw.
Ang isa ka Malaysian nga nalakip sa arestado ang nakapangasawa sang isa ka Pinay.
Ginpahayag nga mahimo magdangat man sa masobra isa ka milyon ka pesos ang balor sang nakumpiskar nga illegal nga sigarilyo nagikan sa mga arestado kag ang mga ini ang nagapatubang na sang kaso nga paglapas sa Republic Act 8424 ukon Tax Reform Act of 1997.
