Nangin epektibo ang pagbutang sang garbage trap sa Mambulok Creek.
Sa interview sang Bombo Radyo Bacolod kay Dr. Anna Maria Laarni Pornan, pinuno sang Bacolod City Disaster Risk Reduction and Management Office, ang garbage trap amo ang paggamit sang mga empty plastic bottles nga ginasulod sa isa ka net kag ginabutang sa sapa nga amo ang nagapugong sa paglabay sang mga basura.
Suno diri, ginasunod nila kuha ang mga natrap nga basura para mahawanan ang sapa.
Sa karun, nagalab-ot sa kapin 15 tubtob 20 ka sako sang basura ang nagakakuha.
Samtang, may yara man sang ginbutang nga flood warning signage sa pila ka sapa sa ciudad.
Ginpintahan ang kilid sang creek sang tatlo ka color para mamonitor ang lebel sang tubig: yellow para sa monitoring, orange para sa alert kag pula para sa evacuate.
Suno kay Pornan, paagi diri mamonitor sang mga residente ang lebel sang tubig kasubong man nga sila mangin alerto ingkaso nga kinahanglan na nga mag-evacuate.
Samtang, nagpanugyan naman si Dr. Grace Tan, head sang Environmental Sanitation Division sang Bacolod City Health Office, angot sa posible nga pagsaka sang kaso sang leptospirosis subong nga tig-ululan.
Ini bangod nga tuman ka damo sang basura nga amo man ang gina-amag sang mga ilaga, kag dugang pa nga mainulanon ang panahon.
Suno diri, sa tion nga magbaha, posible nga makaangkon sang leptospirosis ang tawo kun mahigko ang tubig.
Panugyan sini nga mangin malimpyo sa palibot agud nga mapahagan-hagan ang pagdamo sang basura kasubong man malikawan ang sakit.
