BACOLOD CITY – Nagdangop sa Bombo Radyo ang partner sang isa ka Overseas Filipino Worker (OFW) sa Kuwait agud ireklamo ang agency nga ginaalegar wala gina-follow-up ang ginpalab-ot nga problema sa employer sini.
Suno kay Jeffrey Delgado, 32-anyos, pumuluyo sang Canetown Subdivision, Barangay 19-A, Victorias City, Negros Occidental, nagtawag ang iya partner nga si Melrose Saldy nga nagatrabaho sa Jara, Kuwait agud ipahibalo nga ginamaltratar sini sang iya amo nga si Suwad Mubarak, ginapriso kag kulang ang ginasweldo sa iya.
Sadtong ulihi pa nga semana sang Enero ulihi nga nakaistoryahanay ang duha bangud nga wala na sang cellphone si Melrose apang nagpakitluoy gid ini sa iya nga amo rason nga nakatawag sang amo nga tion.
Bangud sang kahangawa, nagpadulong si Delgado sa agency ni Melrose nga Five Star Agency nga may opisina sa Limmans Building sa downtown area agud mahatagan sang pagtamod ang problema sini.
Wala sini naistorya sang personal ang head sang agency apang nakakuha ini sang numero.
Nagareklamo si Delgado bangud ginpangakuan lang ini nga pakig-angutan matapos ang pila ka adlaw bangud ipadangat pa sa agency sa Manila ang reklamo apang tubtob subong, wala ini gin-contact sang agency kag kun iya tawgan ang head sang agency nga si a certain Sir Marlon, wala ini nagasabat kag sa baylo, ginabalusan ini sa text nga padayon pa nga gina-follow-up ang kaso ni Melrose.
Nakapakig-angot naman ini sa Overseas Workers Welfare Administration (OWWA) apang ginpahibalo ini nga iga-follow-up pa sa Kuwait ang amo nga reklamo.
