Naglunsyar sang panibag-o nga mga pag-atake ang Tehran batok sa mga base militar sang Estados Unidos sa Gulf samtang padayon man ang pagpang-atake sang Washington sa Iran.
Suno sa Tehran, nag-atake sila sa pila ka mga target sa Jordan, Kuwait, kag Bahrain samtang ikaanum nga adlaw na sang liwat nga nagsaka ang tensyon sa Middle East.
Suno naman sa Estados Unidos, nagpatigayon sila sang anum ka oras nga asod-asod nga airstrike sa nagkalain-lain nga bahin sang Iran.
Una na nga nagpaandam si US President Donald Trump sa Iran nga mangatubang sang panibag-o nga pagpang-atake kun indi magbalik sa negosasyon.
Nagpamahog man si Trump nga targeton ang energy infrastructure sang Iran kun mapaslawan nga makig-negosasyon sa US.
Nagpahayag naman ang chief negotiator sang Iran nga si Mohammad Bagher Ghalibaf nga wala sang rason ang ila nga pungsod para sundon ang anuman nga kasugtanan nga indi pabor sa interes sang Iran.
Ginpaathag man sini nga importante sa national security sang ila pungsod ang pagpabilin sang konrol sa Strait of Hormuz.
Sa pinakaulihi nga opensiba, ginpahayag sang US Central Command nga naigo nila ang mga command center, air defense site, kag coastal surveillance facility sa pila ka mga lugar sa Iran, kalakip ang Bandar Abbas kag Greater Tunb Island.
Sa karon, nagpabilin nga sirado ang Strait of Hormuz gani halos nag-untat man ang operasyon sang mga oil tanker nga nagtuga man sang pagsaka sang presyo sang langis sa world market.
