Nagapati ka bala nga posible mapabalik ang mga nagaextinct ukon ang nadula na? Gin-anunsyar sang US bioscience kag genetic engineering company ang labing una sa madinalag-on nga “de-extincted animal” sa bug-os nga kalibutan.
Ini amo ang dire wolf nga na-extinct masobra 12,500 nga ka tuig ang nakaligad.
Sa ila ginpaggwa nga statement, ginpahayag sang Colossal Biosciences nga nakapabun-ag sila sang tatlo ka dire wolves nga amo sanday Romulus, Remus, kag Khaleesi.
Gingamit sang team sang mga scientists ang gray wolves nga amo ang pinakalapit nga pamilya sang dire wolves bilang donor species sa pag-establisyar sang cell lines.
15 tanan ka extinct dire wolf variants ang ginpaidalom sa donor gray wolf genome nga nagtuga sa dire wolves nga may genes nga wala na nagtuhaw sa masobra 10,000 ka tuig.
Magluwas sa dire wolves, nakahuman man ang kompaniya sang duha ka grupo sang red wolves nga ginakabig bilang critically endangered wolf sa bilog nga kalibutan, paagi sa non-invasive blood cloning method.
Sa karon, ang mga nasambit nga wolves ang yara sa 2,000+ acre secure ecological preserve nga na-certify sang American Humane Society kag rehistrado sa United States Department of Agriculture (USDA).
