Nagdangat na sa P10,080,100 ang balor sang tanan nga kasapatan nga nagkalamatay bangod sa tuman ka init sa probinsya sang Negros Occidental.
Suno kay Provincial Veterinarian Dr. Placida Lemana, 19 tanan ka mga Local Government Units ang may yara sang sapat nga nagkalamatay sa ila nga banwa kag ciudad.
11,556 tanan ka mga sapat ang napatay kun sa diin kalabanan diri amo ang manok nga masobra sa 10,000 ang napatay kag iban naman amo ang karabaw, kanding kag iban pa.
Samtang, 870 naman ka mga panimalay ang apektado nga napatyan sang kasapatan.
Ang 19 ka mga Local Government Units amo ang banwa sang Toboso, Manapla, Valladolid, Pontevedra, San Enrique, Pulupandan, Hinigaran, Isabela, Moises Padilla, Ilog, Cauayan, Hinoba-an, Candoni kag ciudad sang Sagay, Talisay, La Carlota, Bago, Sipalay, kag Kabankalan.
Ang may pinakamadamo nga nagkalamatay nga sapat amo ang sa banwa sang Isabela nga nagdangat sa 5,152 sa balor nga P5,956,850 kag ini ang ginasundan sang banwa sang Ilog nga may 4,237 ka mga sapat nga nagkalamatay nga nagdangat sa balor nga P1,482,950.
Panugyan ni Lemana amo nga I-reduce ang population sang mga ginasagod nga sapat agud nga malapad ang ila nga lugar kag kun sila ang ready to dispose na, mas maayo nga ihingagaw na ini baligya.
