Nagdangat sa halos P12 million ang balor sang suspected shabu sa duha ka magkasunod nga drug buybust operation sa Brgy Singcang-Airport kag Brgy 12, Bacolod City halin kagab-i tubtob kaina sang kaagahon.
Una nga narecover ang masobra P3.7 million nga balor sang suspected shabu gikan sa duha ka High Value Individuals (HIV) sa drug buybust operation nga ginpatigayon sang Bacolod Police Station 8 sa Prk. Hollow Blocks, Brgy. Singcang-Airport, Bacolod City alas-11:43 kagab-i.
Ang mga nadakpan ang ginalakipan nanday Alyas Joaquin kag Alyas Mark, nga wala pa sa listahan sang Barangay Anti-Drug Abuse Council (BADAC).
Narecover sa ila ang ginabanta 550 grams sang suspected shabu, nga may estimated standard drug price nga P3,740,000.
Sa separado nga operasyon, masobra P8.16 million nga suspected shabu naman ang narecover sa 44 anyos nga lalaki sa drug buybust operation nga ginpatigayon sang Bacolod Police Station 1 sa Brgy 12, Bacolod City ala-1:00 kaina sang kaagahon.
Ang naaresto ang ginkilala nga si Alyas Ernesto, wala man sa BADAC list.
Narecover sa iya ang ginabanta 1,200 grams sang suspected shabu nga may estimated Standard Drug Price nga P8,160,000.
Sa kabug-usan, nagdangat sa balor P11,900,000 ang narecover nga suspected shabu sa duha ka operasyon.
Ang mga naaresto ang natalana mangatubang sang kaso sa paglapas sang Republic Act 9165 ukon Comprehensive Dangerous Drugs Act of 2002.
