Nagpagwa ang Department of Budget and Management (DBM) sang masobra P3.627 billion nga pondo para sa electrification sang mga rural areas.
Ini ang kasunod sang tinutuyo ni President Ferdinand “Bongbong” Marcos Jr. nga malab-ot ang total electrification sang bug-os nga pungsod antes matapos ang termino sini sa 2028.
Sa isa ka pahayag, gin-aprubahan ni DBM Budget Secretary Amenah Pangandaman nga ang Special Allotment Release order (SARO) para sa ‘2025 Strategized Rural Electrification and Operational Reliability for Electric Cooperatives’ sa idalom sang National Electrification Administration (NEA).
Ang nasambit nga kantidad magasakop sa electrification sang 1,752 ka mga sitio kag lima ka mga barangay sa idalum sang 2025 subsidy.
Dugang nga P68.83 million ang ginpain para sa rehabilitasyon sang lima ka mga barangay nga ginaserbisyuhan anay sang off-grid solutions paagi sa ‘Barangay Line Enhancement Program’.
Magluwas diri, may kabug-usan nga P120 million ang gamiton sa pagbakal kag pagpanagtag sang 4,000 ka mga units sang Solar Photovoltaic Mainstreaming agud mahatagan sang kuryente ang mga komunidad nga wala sang kuryente.
Suno sa DBM, 9,622 pa lamang ka mga target nga sitio ang wala pa sang kuryente, nga ginaplano man nga pondohan sa idalom sang national fund tubtob sa tuig 2028.
