Masobra tunga sa milyon ka pesos nga balor sang suspected shabu ang narekober sa duha ka persona nga nadakpan sa drug buybust operation nga ginpatigayon sang mga kapulisan sang Bacolod City Police Station 2 sa Barangay 7, Bacolod City kahapon, Enero 23, 2024.
Ginkilala ang duha ka arestado nga sanday Jaypee 20 anyos, residente sang Purok Sigay, Barangay 2 isa ka high value individual (HVI) kag Edgar 29-anyos, ginakabig street level individual (SLI) kag residente naman sang Purok Magtiayon Barangay 10 sang nasambit nga ciudad.
Narekober sa mga suspetsado ang 80 grams sang suspected shabu nga ginabulubanta may may standard drug price nga P544,000 kag iban pa nga mga non-drug items.
Sa interview sang Bombo Radyo Bacolod kay Police Major Eugene Tolentino, station commander sang Bacolod Police Station 2, matapos ang ila ginpatigayon nga monitoring, natigayon nila nga madakpan ang duha ka persona kahapon sang kaagahon.
Suno kay Tolentino, ginalantaw sang mga ini nga ang duha ang natabuan lamang nga nagatransaksyon bangud mahimo nagkulang ang supply nga idagdag sang isa sa mga ini.
Suno sa station commander wala pa sang mga ini mahibaluan kun sa diin sang duha nakuha ang supply sang illegal nga druga.
Ginapahayag nga ang isa sa subject person ang menor de edad pa lang matunog na ang pangalan sini nga imbulbado sa transaksyon sang illegal nga druga.
Indi pa masiguro kun ang mga ini ang kaupod sang mga subject person ang upod man sang mga nagkaladakpan sang Bacolod City Drug Enforcement Unit.
Sa karun ginahikot na sang Bacolod City Police Station 2 ang mga papeles agud nga mapasaka na ang kaso nga paglapas sa RA 9162 ukon Comprehensive Dangerous Drugs Act of 2002.
