BACOLOD CITY — Magasapol subong nga semana ang miyembro sang technical working group kag iban pa nga opisyal sang Negros Island Region sa National Economic and Development Authority Region 6 matapos nga gin-dissolve ang NIR pinaagi sa Executive Order 38 ni Presidente Rodrigo Duterte.
Sa Good Morning Philippines Program sang Bombo Radyo Bacolod, ginpahayag ni Dr. Ma. Lina Sanogal, coordinator sang Provincial Planning and Development Office, nga magapadulong siya sa Martes sa ciudad sang Iloilo agud nga makigsapol kay NEDA Region 6 Director Ro-ann Bacal.
Mismo si Bacal ang nagpahibalo kay Sanogal tuhoy sa pagsinapol.
Magluwas diri, may igatalana man nga meeting ang mga regional directors nga miyembro sang Regional Development Council.
Magapungko man sila kaupod ang Department of the Interior and Local Government nga amo ang maga-supervise sa pagrevert sang regional offices ukon pagbalik sa Region 6 kag Region 7.
Aminado si Sanogal nga nagakasubo ang taga-NIR bangud magluwas nga matunaw na ang rehiyon, ginapaabot naman nga wisik-wisik lamang sang mga proyekto sang Region 6 ang magakadto sa Negros Occidental, kag amo man ang iya sang Negros Oriental sa Region 7.
Nahibaluan nga bangud sa NIR, nakadihon na kuntani ang kapid nga probinsya sang mga proyekto nga gina-aprubahan sang RDC sang rehiyon.
