Ginmanduan ni Mayor Evelio “Bing” Leonardia ang kapulisan subong man ang Emergency Operations Center nga hugot nga iimplementar ang ginapatuman nga liquor ban sa Bacolod City matapos maglab-ot sa iya ang report nga may mga establishemento nga wala nagatuman kag nagabaligya gihapon sang alcohol sagwa sang curfew hours.
Sa interview sang Bombo Radyo kay Leonardia, gin-athag sini nga nagapadayon ang liquor ban sa ciudad kun sa diin alas 12:00 sang udto tubtob alas 6:00 sang gab-i lang sarang makabakal sang alcoholic drinks kag indi ini pwede imnun sa public places.
Suno sa iya, iya na ini ginpaareglo kag gintugyan sa EOC kag kay City Administrator Em Ang kag samtang epektibo pa ang nasambit nga executive order, igareview kag hugot nga iimplementar man ini sang kapulisan.
Suno sa alkalde, lokal ini nga pagsulundan kag indi na kinahanglan nga ipalab-ot sa national interagency task force apang kadungan sang desisyon sang NIATF sa status sang ciudad sa masunod nga bulan, ila man lanatawon kun magapatigayon sila sang adjustment ukon ipabilin ang nasambit nga mando.
Nagpahanumdum man ini nga apisar nagnubo na ang kaso sa ciudad, indi dapat magpakampante kag magsunod gid sa health protocols.
