Nagpagwa naman si Bacolod City Mayor Evelio “Bing” Leonardia sang Executive Order No. 38 Series of 2020 may kaangtanan sa modified general community sa ciudad sang Bacolod sugod subong nga Hunyo 1.
Sa idalom sini, mahimo na ang tanan nga makagwa sa tagsa ka balay apang gina-egganyo sang Bacolod City government ang mga naga-edad sang 21 anyos panubo kag ang mga 60 anyos pasaka, ang mga may immunodeficiency, comorbidities, kag iban nga health risks kag pregnant women nga magpabilin sa balay.
Sa interview sang Bombo Radyo Bacolod kay Vice Mayor El Cid Familiaran, ginpahayag sini nga mas halog na ang pagsulundan sang MGCQ.
Suno diri, nakahanda na ang mga kapulisan kag City Health Office personnel sa pagtsekyar sa mga establishimento kaangay sang mga restaurants kun nasunod ang social distancing apang wala pa ini nakahibalo kun ipatuman sang mga negosyante ang pagbutang sang logbook agud mas mahapos ang contact tracing ingkaso may nagpositibo sa nagkaon sa mga restaurants.
Aminado man ini nga mabudlay ang sitwasyon sang nagapaidalom sa ECQ ukon GCQ bangud apektado ang ekonomiya gani apisar nga indi pa hilway ang tanan, ginhalugan ang pagsulundan para sa ekonomiya.
Sa pihak sini, nagpanugyan na lamang ang bise alkalde sa mga pumuluyo nga mas maayo nga magtinir na lamang sa balay kun wala man sang importante nga kadtuan kag pangamuyo nga indi matabo sa ciudad sang natabo sa Cebu kadungan sang paghalog sang pagsulundan nga nagdamo ang infected bangud sa pag-inom kaupod ang mga abyan.
Nakasaad sa EO nga padayon nga ipatuman ang curfew sang ciudad humalin alas 10:00 sang gab-i tubtob alas 04:00 sang aga.
Exempted naman ang mga nagatrabaho sa night shifts, public emergencies kaangay sang fire/ambulance services kag iban pa nga mga okasyon nga tuga sang disaster, kalamidad kag ang mga nagarequires sang medical assistance nga sakay sang Public Utility Vehicles (PUVs) ukon pribado nga salakyan. Samtang, ginpahayag ni Bacolod City Mayor Evelio “Bing” Leonardia, nga ang Hunyo 1 ang umpisa nga makabig nga “survival of the fiittest” ukon “matira ang matibay”, bangod indi mahibaluan kun sin-o sa mga maka-atubang ang nagasuprer sang balatian.
Apang ginaklaro naman sini nga may nagakaigo nga rasun kun ngaa ginpatuman sang gobyerno ang mga phases, ilabi na ang pagbaylo sa MGCQ.
Suno sa Mayor, indi makasulbar ang mga negosyo kag mapukan ang ekonomiya kung indi pa ini makabalik sa operasyon.
Samtang suno diri, wala pa gihapon mahuman ang executive order nahanungod sa MGCQ, samtang magabutang naman ini sang oversight committee nga amo ang mga track sang nagakatabo, agud nga maangot naman sa reyalidad sang sitwasyon.
