BACOLOD CITY — Nagdeklarar na sang outbreak sang measles ukon tipdas sa ciudad sang Kabankalan diri sa Negros Occidental.
Ini matapos nga nagpositibo sa tipdas ang tatlo ka mga pasyente nagikan sa Brgy. Camugao, Kabankalan nga ginasuspetsuhan nagsufrer sang amo nga masakit sang tinalikdan nga bulan.
Kahapon, Lunes, naggwa ang resulta sang laboratory test nga ginpatigayon sang Research Institute for Tropical Medicine (RITM) sa Muntinlupa City.
Madumduman nga naconfine sa Corazon Locsin Montelibano Memorial Regional Hospital ang mga pasyente sang nagligad nga Pebrero.
Suno kay Mayor Isidro Zayco, nga amo ang nagdeklarar sang outbreak sa ciudad, wala man sila sang mahimo bangud sa pagsulundan gani sang Department of Health (DOH), bisan isa lang ang kumpirmado nga kaso sang measles mahimo na nga makadeklarar sang outbreak.
Bangud sang naggwa nga resulta, apat na ang kumpirmado nga kaso sang tipdas sa Negros Occidental matapos ang isa ka kaso sa banwa sang Cauayan.
Sang tinalikdan nga tuig, wala sang tipdas nga narekord sa probinsya.
Ang deklarasyon sang outbreak sa Negros Occidental ang ikaapat na sa pungsod, matapos ang outbreak sa Negros Oriental.
Suno kay Zayco, padayon man ang ila nga paghatag sang bakuna kontra tipdas sa mga kabarangayan sa ciudad.
