Nagapati ang medical center chief sang Corazon Locsin Montelibano Memorial Regional Hospital (CLMMRH) nga mas maayo kun ang mga pili nga purok kag barangay lang ang ipadalum sa lockdown sangsa ibalik ang status sang ciudad sa enhanced community quarantine.
Madumduman nga ginpahayag ni Vice Mayor El Cid Familiaran nga nakasaad sa sulat sang grupo sang mga doktor ang ila nga concern ilabi na sa nagasaka nga kaso sang coronavirus kun sa diin ang Bacolod ang nagapanguna sa Western Visayas sa may pinakamadamo nga indigenous cases.
Ila man ginhatagan-pagtamod ang mga ospital nga nagdeklarar nga yara na sila sa full capacity kag ila man gin-ako nga ginakapoy na sila.
Sa interview sang Bombo Radyo kay Dr. Julius Drilon, ginpahayag sini nga iya ginarespeto ang apelasyon sang mga doktor sa Bacolod apang nagapati ini nga mangin mabudlay kun ibalik ang ciudad sa ECQ ilabi na sa bahin sang ekonomiya.
Suno kay Drilon, mas maayo kun selective lockdown lang agud matutukan ang mga purok ukon barangay nga may madamo nga kaso.
Gindugang man sini nga apisar ipadalum sa ECQ ang ciudad, pagkatapos sang duha ka semana, magabaton man gihapon sang mga locally stranded individuals (LSI), overseas Filipino workers (OFW) kag mga authorized persons outside residence (APOR).
Nagapati man ini nga wala sang supisyente nga pondo ang city government kun ipaidalum liwat sa ECQ ang ciudad.
Suno sa medical center chief, isa sa mga factor kun nga nagadamo ang kaso sa Bacolod ang bangud may yara na sang kaugalingon nga molecular laboratory nga maka-akomodar sang masobra libo ka mga swab samples, gani mas madasig ang resulta.
Aminado man si Drilon nga ginakulang na sila sa testing kits kag kun wala sang may maabot nga dugang nga supplies subong nga adlaw, posible nga maubusan na ang CLMMRH.
