Nagdangat sa napulo ka barangay ang naapektuhan sang pagbaha sa syudad sang Victorias, Negros Occidental kahapon sang kaagahon Enero 1.
Sa interview sang Bombo Radyo Bacolod kay Victorias City Mayor Frederick “Wantan” Palanca, nangin masadya ang pagsugata sang bag-ong tuig sa syudad sang Victorias bangud sa fireworks display kag diutay nga firecrackers.
Suno kay Palanca, ala-1:00 sang kaagahon nag-ulan kun sa diin nagsaka man ang lebel sang tubig.
Kapin 400 ka pamilya ukon kapin isa ka libo ka indibidwal ang naapektuhan sang baha.
Suno sa alkalde, ipasurvey naman sini ang ginhalinan sang pagbaha.
Ginpahayag man ni Palanca nga wala sang kamatuoran nga nagikan sa nag-awas nga dam ang tubig baha.
Suno diri, problema sa mga buhang nga nagakatiphag bangud sa natipon nga tubig-ulan ang isa man sa ginalantaw nga rason sang pagbaha sa lugar.
Gindugang man sini nga nagikan sa danger zone ang apektado sang pagbaha kaangay lamang sang mga nagapuyo malapit sa pangpang sang suba.
Ginpahayag man sang alkalde nga ang halos tanan nga ginpang-evacuate nga ginbutang sa cultural center sa syudad ang nakapauli na magluwas nalang sa tatlo ukon apat kapamilya nga naanod ang balay bangud malapit sila sa pika pika sang suba.
Natalana naman nga lantawon sini ang lugar nga ginbahaan sa tion nga maghubas na ang tubig baha.
Sa pihak nga bahin, natalana nga iaward na sang syudad sa mga beneficiaries ang balay sa relocation site subong nga bulan sang Enero.
