Ginahulat nalang sang mga barangay sa Bacolod City ang registration form nga pagasulatan sang mga pumuluyo nga luyag magpabakuna kun mangin available na ang COVID vaccine.
Sa interview sang Bombo Radyo kay Punong Barangay Boy Pico, ginpahayag sini nga kun mangin available na ang registration form, magasugod na sila sa pagrehistro sa mga luyag magpabakuna batok sa virus.
Suno kay Pico, magapatigayon sila anay sang information education campaign agud mapahibalo ang mga pumuluyo kun ano ka-importante ang mabakunahan.
Suno sa iya, kapin 50 mil ang populasyon sa Barangay Mansilingan kag wala pa sila sa karun nakahibalo kun pila kabilog ang I-alokar sang local government sa ila barangay.
Apang ila himuon prayoridad ang mga frontliners, senior citizens kag uniformed personnel.
Gindugang man sini nga magabutang na lang sila sang registration center kada purok agud indi na mag-usik sang tiyempo kun maghouse to house.
Suno sa punong barangay, may yara sang 37 ka mga dalagko nga purok sa Mansilingan kag lima ka mga subdivisions.
Subong nga adlaw, magapatigayon sila sang session sa barangay tuhoy sa preparasyon sang venue sang vaccination center kag refrigeration unit.
