80 porsyento na nga preparado ang mga pasilidad sa Negros Occidental High School nga pagatiniran sang mga delegates sang Negros Occidental sa Western Visayas Regional Athletic Association (WVRAA) Meet 2024 maga-umpisa sa Mayo 2, kag magatakop sa Mayo 7.
Sa interview sang Bombo Radyo kay Donna Bella Aposaga, assistant principal II sang NOHS, 106 tubtob 110 ka mga classrooms ang ginpreparar para sa mga delegates, coaches kag mga chaperons nga ginalantaw magadangat sa 700 tubtob 900.
Aminado si Aposaga nga may pagpanghangkat sa bahin sang tubig bangud tuman karun kainit ang tiyempo gani ila ginakay-o ang mga water pumps.
May mga nagakamalhan man nga mga water source gani sila ang nagacoordinate sa Bureau of Fire Protection nga magarasyon sang tubig sa tanan nga billeting schools.
Sa bahin sang ventilation, suno diri, nahamtang sa mga high rise buildings ang mga kwarto kag may mga floors man nga mahangin.
May mga wall fans, stand fans kag bintana man sa kada classroom.
Suno diri, nasolbar na nila ang problema sa mga comfort rooms sang nagligad nga Provincial Meet kag sa bag-o nga buildings, sa kada floor may yara sang CR para sa lalaki kag babaye.
Nagapasalamat ini sa Division of Negros Occidental bangud wala ini nagapabaya kag nagabulig man sa pagpreparar sang eskwelahan nga pagatiniran sang mga delegado sang probinsya sa WVRAA 2024.
Samtang, mismo ang delegasyon sang probinsya sang Guimaras ang nagpili sang Bata Elementary School 1 kag 2 agud mangin billeting area para sa Western Visayas Regional Athletic Association (WVRAA) Meet 2024.
Nahibaluan nga ang WVRAA 2024 ang maga-umpisa sa Mayo 2 tubtob 8.
Sa interview sang Bombo Radyo Bacolod kay Arnel Ariola, principal sa Bata Elementary School 1, Abril 21 pa lamang naka-abot na ang 18 ka advance party sang Guimaras delegation, nga ginsundan sang dugang nga mga technical working groups kasunod nga adlaw.
Paathag sini nga wala nalakip sa orihinal nga listahan sang billeting area ang ila buluthuan, apang ginsuhestyon mismo sang Guimaras delegation nga diri sila ihamtang.
Ang advance party ang incharge sa pagpatahom kag pagset-up sang ila kaugalingon nga kitchen sa buluthuan.
Suno kay Ariola, masobra 600 ang Guimaras delegation kun sa diin 392 ang numero sang atleta.
Paathag sang School Principal nga bangod sa tuman ka damo nga palakan-on, indi maayo nga paagi sa pagluto ang gas stove, gani sila ang nagtukod sang kaugalingon nga kitchen kag nagdala man mismo ang magatong nga kahoy kag sila ang nagdala naman sang gamiton nga utensils kasubong man freezer.
Ang Bata Elementary School 1 ang may-ara sang 56 ka mga classrooms kun sa diin 53 diri ang gamiton sang Guimaras delegates, kag sila ang may kwarto pa nga gamiton bilang clinic kag computer room.
Ang beddings para sa Guimaras delegation ang nakasugtan naman nga provided sang Department of Education (DepEd) division of Silay kag Victorias.
Ginapasalig man ni Ariola nga may pader kag CCTV sa buluthuan samtang dila ang may duha man ka deepwell nga may dalagko nga tangke, gani maseguro man ang water supply.
Nakig-angot naman sila sa Barangay Bata, nga maga-augment sang Barangay Tanod kasubong man mga kapulisan agud maseguro ang kahilwayan sang mga atleta kag iban pa.
Ginalauman nga bwas, alas-6:00 sa aga, maga-abot na ang iban pa nga mga katapo sang delegasyon via Pulupandan.
