Padayun sa karun ang training sang mga boksidor nga magahampang sa 2024 Paris Olympics sa Germany.
Sa interview sang Bombo Radyo Bacolod kay Reynaldo Galido, head coach sang Women’s Boxing sa Paris Olympics, sila ang nag-umpisa sa training camp sa Germany sang Hulyo 10.
Kun sa diin may routine nga ginasunod ang mga boksider kag may schedule man sang sparring.
Magluwas sa mga Filipino athletes, nagaka-atubang nila sa sparring session ang mga players gikan sa iban nga pungsod nga ila man makasumpong sa Olympics.
Suno kay Galido, siya ang nagakapyot kanday Nesthy Petecio kag Aira Villegas samtang kaupod man nila sanday Carlo Paalam kag Eumir Marcial.
Nahibaluan nga ang opening sang 2024 Paris Olympics ang nakaschedule Hulyo 26 kag magatakop ang pahampang sa Agosto 11.
Sa Hulyo 22, sila ang magasulod na sa Athlete’s Village sa Paris kag si Villegal ang una nga magahampang sa Hulyo 28, samtang Hulyo 30 naman ang first game ni Petecio.
Sila ang may kaupod man nga dietician nga amo ang nagahatag sang guide sa pagkaon sang mga atleta.
Suno kay Galido, apisar nga silver medalist si Petecio sa nakaligad nga Olympics, ini ang wala ginapaminsar sang atleta agud indi makahatag sang pressure sa iya.
Pasalig sang coach nga maayo ang kondisyon sang tanan nga boksidor kag ang ila nga mindset ang lunsay nakafocus sa Olympics.
Si Petecio ang mahampang sa 57kg featherweight division samtang si Villegas ang magahampang naman sa 50kg flyweight division.
Suno kay Galido, mas madamo sa karun ang mga partisipante sang Pilipinas kun ipaanggid sang tinalikdan nga Olympics.
Panawagan sang coach ang suporta kag pangamuyo sang mga Pilipino para sa tanan nga atleta nga magahampang para sa Pilipinas.
