Ginpili sang mga ginikanan sang mga graduating students sa Handumanan Elementary School 2 nga magsuksok sang toga ang ila mga kabataan sa natalana nga graduation ceremony sa Mayo 31.
Sa interview sang Bombo Radyo Bacolod kay Leo Ceralbo, principal sa Handumanan Elementary School 2, ang ila graduation rites ang patigayunon sa gym sang Barangay Handumanan kag maga-umpisa alas-8:00 sa aga.
Ini bangod nagadangat sa masobra 300 ang mga magradwar nga Grade 6 students kag indi maka-igo sa gym sang buluthuan.
Ang moving up ceremony sang Kindergarten ang ginpatigayon naman subong nga adlaw sa gym sang eskwelahan bangod yara lamang sa 200 ang mga movers.
Ginakalipay ni Ceralbo nga apisar sa mga sablag kaangay sang mataas nga heat index, nasurvive sang mga kabataan kag nasumiter ang ila performance task.
Ginaseguro naman nila ang mga pormas kag diploma bangod sa Hunyo indi na matandog ang mga manunudlo.
Suno man sa mandato, simple lamang ang graduation rites kag ang tanan nga gastos ang magagikan sa School maintenance and other operating expenses (MOOE).
Apang sa pihak sini, nanindugan ang mga ginikanan nga sila ang handa maggastos mapasuksukan lamang sang toga ang ila mga kabataan ilabi na nga ini ang tumalagsahon lamang.
Ang arkila sa toga para sa elementarya ang yara lamang sa kapin P100.
Aminado naman si Ceralbo nga may ginikanan nga nag-ako nga indi ini makasarang, kun sa diin iya nga ginpasalig nga siya na lamang ang magabayad.
