BACOLOD CITY — Ginsunog sang mga gina-alegar New Peoples Army ang duha ka mga heavy equipment nga gina panag-iyahan sang isa ka private construction company sa quarry site sa Barangay Caticugan sa banwa sang Siaton, Negros Oriental, Domingo sang hapon.
Santo sa inisyal nga imbestigasyon, lima ka mga armado nga lalaki nga sakay sang motorsiklo ang nagsunog sang isa ka backhoe kag payloader sang Medalla Construction nga ginapanag-iyahan ni Medalla Yocor Sia, 53-anyos, residente sang Barangay Banilad, Dumaguete City.
Santo sa panaysayon sang mga testigo, nagsinggit ang nasambit nga kalalakin-an sang “okey na, mabuhay ang NPA” matapos nga ginpaarakan sang luthang ang windshields sang mga heavy equipment kag gilayon nga nagpalagyo.
Narekober sa crime scene ang 45 ka fired cartridges kag tatlo ka live ammunitions sang carbine, siyam ka fired cartridges kag duha ka live ammunition sang caliber 9mm Luger kag isa ka deformed slug sang wala pa natumod nga kalibre sang armas kag isa ka container nga may unod pa nga gasolina.
Wala naman sang napilisan sa insidente.
Padayon pa ini nga gina-imbestigaran sang Siaton Municipal Police Station sa pagpamuno sang ila hepe Chief Inspector Varie Villanobos.
