BACOLOD CITY — Dayun na ang paghatag sang Department of Education Division of Bacolod City sang cash incentives sa mga atleta nga nakakuha sang medalya sa Palarong Negros Island Region 2017 nga ginpatigayon sa ciudad sang Dumaguete.
Nahibaluan nga ang Bacolod City Division amo ang nagkampeon sa regional meet sang Pebrero 24 tubtub Marso 1.
Sa interview sang Bombo Radyo kay Schools Division Superintendent Cynthia Demavivas sang DepEd Division of Bacolod City, igapanagtag ang cash incentives sa isa ka programa nga patigayunon sa masunod nga inadlaw matapos ang motorcade nga patigayunon sang ciudad sang Bacolod padulong sa Bacolod City Government Center.
Aminado si Demavivas nga kulang ang 300 mil pesos nga una ginpa-in sang division office para sa cash incentives bangud wala ginlauman nga tuman kadamo ang mga atleta nga makakuha sang medalya sa regional meet.
Ang amo nga pondo ang ginkuha nagikan sa Special Education Fund sang division office.
Pagkatapos sang NIRAA Meet, pagahandaan naman sang mga atleta ang pagsabak sa Palarong Pambansa sa probinsya sang Antique sa bulan sang Abril.
