BACOLOD CITY — Nasubuan man apang ginarespeto sang mga opisyal sang Negros Occidental ang nangin desisyon ni Presidente Rodrigo Duterte nga bungkagon ang Negros Island Region.
Suno kay Governor Alfredo Marañon Jr., gamay lang ang pagkadismaya nga iya nabatyagan bangud ginalauman na gid man ang paggwa sang Executive Order nga magabasura sang EO nga nagtukod sang NIR.
Madumduman nga sang nagligad nga tuig, ginpahayag ni Budget Secretary Benjamin Diokno nga pilirmahan nalang sang presidente ang EO nga maga-abolish sa rehiyon.
Sa pihak sini, napamatud-an sang NIR suno kay Marañon kun ano ang iya masarangan sa sulod sang malip-ot nga panahon.
Ginpasalig man sini nga magapadayon sa gihapon ang pagtinguha sang provincial government para sa kaayuhan sang taga-NIR.
Suno naman kay Dr. Ma. Lina Sanogal, coordinator sang Provincial Planning and Development Office kag miyembro sang technical working group sang NIR, maayo naman ini bangud natuldukan ang mga palamangkutanon tuhoy sa kapalaran sang NIR nga nagtublag sa mga Negrense humalin sang nagligad nga tuig.
Wala man ini sang malain nga epekto sa duha ka probinsya bangud mas nagbaskog ang pag-abyanay sang Negros Oriental kag Occidental kag ini ang magapabilin bisan magabalik sa Region 6 ang Occidental kag sa Region 7 naman ang Oriental Negros.
Suportado naman ni Negros Oriental Governor Roel Degamo ang desisyon ni Duterte nga bungkagon ang NIR.
Sa exclusive interview sang Bombo Radyo, ginpahayag ni Degamo nga wala na sang mahimo ang taga-NIR bangud napirmahan na sang presidente ang Executive Order 38 nga nagbasura sa EO 183 nga nagtukod sang NIR.
Madumduman nga sang una, nagapang-alang-alang si Degamo sa paghugpong sang Oriental kag Occidental Negros apang nalugpayan man ini kasunod sang serye sang konsultasyon.
Apang bisan magabulagay na ang kapid nga probinsya suno kay Degamo, magapabilin man gihapon ang mga programa nga nagaangot sa Occidental kag Oriental Negros.
Ini bangud magapadayon man ang link of communication sa tunga sang duha ka mga probinsiya.
Nanugon naman si Negros Occidental Vice Governor Eugenio Jose Lacson sa pagkabungkag sang NIR.
Suno diri, nakit-an na kuntani sang mga opisyal kag mga pumuluyo nga maayo ang Negros Island Region apang magabulagay naman ang duha ka probinsya nga yara lamang sa isa ka isla.
Sa pihak sini, suportado man sang bise gobernador ang pahayag ni Governor Degamo nga magapabilin ang constant communication sang Occidental kag Negros Oriental.
