Preparado na ang mga pulis sa Bacolod sa posible nga pagpatigayon sang militante nga mga grupo sang hublag protesta kadungan sang State of the Nation Address ni Presidente Ferdinand ‘Bongbong’ Marcos Jr. sa Lunes.
Sa interview sang Bombo Radyo kay Police Major Ramil Sarona, station commander sang Bacolod Police Station 1, nagapadayon sa karon ang monitoring sang Bacolod Police Station 1 agud mahibaluan kun ano nga mga grupo ang makigbahin sa hublag protesta sa Hulyo 25.
Suno kay Sarona, may mga personnel ang Police Station 1 sa masami nga protest area.
![](https://img.bomboradyo.com/bacolod/2022/06/BACOLOD-POLICE-STATION-1.jpg)
Naghanda naman ang Bacolod City Police Office sang 100 ka personnel nagikan sa Civil Disturbance Management nga maga-augment sa mga personnel sang Police Station 1.
Ang masami nga ginabantayan suno kay Sarona sa tion sang SONA sang presidente amo ang Fountain of Justice sa atubang sang old city hall.
Suno kay Sarona, precautionary measures ini sang BCPO pananglitan madamo ang mag-upod sa rally.
Naghingyo naman ang station commander sa mga raliyesta nga patigayunon ang hublag protesta sang matawhay kag malinong.