Naghugpong ang mga pumuluyo sang Purok 4, Barangay Gargato, Hinigaran, Negros Occidental agud ipanawagan kay Mayor Jose Nadie Arceo nga irelease na ang business permit sang bularan sang uga ni Lucita Libria.
Madumduman nga una nagdangop si Libria sa Bombo Radyo Bacolod Bangod sa nakumpleto na sini ang tanan nga requirements apang ginhold sang alkalde ang business permit.
Ini bangod sa reklamo sang kaingod nga beach resort, nga ang tag-iya ang gina-alegar paryente kag financier ni Arceo sa eleksyon
Nahibaluan nga masobra 200 ang mga pumuluyo nga nagpirma sa manifesto nga nagasuporta sa pag-operar sang negoyo ni Libria samtang ginalantaw kapin 400 naman ang mga makapulos kuntani kag makatrabaho sa bularan sang uga.
Suno kay Nestor Bacina, siya ang sadto nagapanagat apang karun nga senior citizen na, indi na sini masarangan.
Gani dako ang pasalamatan nila sa bularan sang uga ni Libria bangod bisan paano sila ang maka-income.
Suno diri, madamo sila ang makabenepiyo sa negosyo kag wala man sila sang masaway.
Paathag sini nga nagabaho lamang ang ugahan depende sa pag-atipan kag matinlo ang pamaagi ni Librea.
Panindugan sini nga bangod sila ang residente man sa lugar, sila ang una nga magareklamo kun mabaho gid man ang ugahan bangod mahalitan man ang ila magagmaynga mga apo.
Suno naman kay Nicel Semilon, kun maka-operar si Libria, wala na sang problema ang mga mananagat nga makakuha sang tuloy bangod sila ang may-ara na sang bagsakan sang produkto, nga sadto nagabaho lamang sa kilid sang dalan bangod wala sang nagakuha.
Sila kalakip na ang mga estudyante ang nagamata naman alas-4:00 pa lamang sang kaagahon agud makabulad sang uga, kag may-ara sang gawion sa bilog nga adlaw kag balon sa eskwelahan.
Naluoy man ini sa negosyante bangod apisar may duta na indi man sini magamit kag naga-arkila pa sa iban nga area agud didto makabulad sang uga, nga amo man ang ginasunod sang mga residente apisar malayo.
