Ginakalipay sang gobernador sa Negros Occidental nga nagpanaog na sa Alert Level 2 ang status sang Bulkan Kanlaon.
Sa interview sang Bombo Radyo Bacolod kay Governor Eugenio Jose “Bong” Lacson, nakita ang pagnubo sa daily activities sang bulkan gani ginpanaog na ang Alert Level Status gikan sa Alert Level 3.
Bangod sini, makapauli na ang evacuees gikan sa four to six kilometers extended danger zone.
Sa pihak nga bahin, bisan mangin Level zero pa ang status sang bulkan, panindugan ni Lacson nga indi nagid pabalikon ang mga nagapuyo sa sulod sang 4km permanent danger zone.
Ini ang ginalakipan sang 15 ka pamilya gikan sa Barangay Cabagnaan kag Biak na Bato sa banwa sang La Castellana.
Ang mga ini ang mapabilin gid anay sa mga evacuation centers tubtob nga mapangitaan sang relocation site.
Pasalig sang gobernador nga may duha na ka propedad nga ginalantaw, kag unahon nila asikaso ang 8 hectares flat land, bangod ini ang malapit lamang sa eskwelahan.
Suno diri sila ang nagkasugot na sa presyo sang duta kag ginaproseso nalang ang pagbakal.
Samtang prayoridad naman sa rellocation site amo ang mga pumuluyo nga yara sa evacuation sites.
Sa pihak nga bahin, aminado man ini nga may figures na sang financial aid nga ginrequest ang mga apektado nga local government units sa Department of Budget and Management, apang sila ang nabudlayan nga maclaim ang kuntani ayuda.
Ang pagbuhin sang evacuees ang minus gastos naman para sa provincial government.
Samtang, ginklaro sang Municipal Disaster Risk Reduction and Management Office sang banwa sang La Castellana nga indi pa nila gilayon mapapauli ang mga residente nga nagapuyo sa 4 to 6 km extended danger zone sang Bulkan Kanlaon apisar nga ginpanaog na sa Alert Level 2 ang status sang bulkan.
Sa interview sang Bombo Radyo Bacolod kay La Castellana MDRRMO Head John de Asis, magapatigayon sila bwas sang management training para sa mga residente nga natalana na nga magpauli.
Suno kay de Asis, ang mga evacuees nga magapauli ang gikan sa lima ka Barangay, nga ginalakipan sang Brgy. Sag-ang, Mansalanao, Babagnaan, Biak-na-bato kag Masulog.
Samtang mapabilin naman sa evacuation centers ang mga gikan sa sulod sang 4 km permanent danger zone.
Ini ang ginalakipan lamang sang 15 ka pamilya gikan sa Brgy Cabagnaan kag Biak na Bato.// Ang mga ini ang yara na sa mga evacuation centers sa sulod sang masobra isa ka tuig.
Ini bangod sila ang gin-evacuate na sang maglupok ang bulkan sang Hunyo 3, 2024, samtang ang mga gikan sa 4km to 6km ang gin-evacuate naman sang maglupok ang Bulkan sang Disyembre 9, 2024 sang ginpasaka sa Alert Level 3 ang status sang Bulkan.
Suno diri, may mga farm lands sa sulod sang 4km nga ginadumilian sang layi.
Samtang sa una nga eruption sang Hunyo 2024, nakita na nila ang kahalitan sini sa mga pananom, gani plano nila nga ireclassify ang lugar bilang strict protection zone.
Pasalig ni De Asis nga ginaproseso na ang rellocation sa apektado nga residente.
Sa pihak nga bahin, nagahulat nalang sang instruction ang Punong Barangay sa Barangay Biak na Bato, sa banwa sang La Castellana kun san-o papulion ang mga evacuees karun nga napanaog na sa Alert Level 2 ang status sang Bulkan Kanlaon.
Sa interview sang Bombo Radyo Bacolod kay Punong Barangay Joselito Martinez, sila ang magapatigayon pa sang meeting upod sa Municipal Disaster Risk Reduction and Management Office, kun sa diin sila ang magahulat man sang instructions.
Pahayag sini nga sadto ang mga residente sa 5.2 km extended danger zone palayo nga gindala sa evacuation site Municipal Proper, ang ginsaylo na sa ila tagsa ka Barangay.
Sa ila Barangay, may-ara sang 238 ka pamilya nga nagatinir sa covered court kag malapit sa barangay hall.
Ginapasalamat sini nga makaligad sang walo ka bulan, ang mga pumuluyo ang makabalik na gid man sa ila mga pamalay.
Suno diri, ang mga mabilin amo lamang ang mga nagapuyo sa sulod sang 4km permanent danger zone sang Bulkan Kanlaon, apang ini ang ilisipon lamang.
Aminado si Martinez nga wala sila sang maipabalon sa pagpauli sang mga residente sa ila panimalay, apang ang Barangay ang magabulig gid sang ginagmay kutob sa masarangan.
