Wala pa gihapon napasakaan sang kaso nga theft ang duha ka mga suspect sa pagkawat sang ”’The Mango Harvesters’ painting ni National Artist Fernando Amorsolo sa Hofileña Museum sa Silay City, Negros Occidental sadtong Hulyo 3.
Sa interview sang Bombo Radyo Bacolod kay Police Lt. Col. Anthony Darroca, hepe sang Silay City Police Station, ginahulat pa nila ang abogado sang Hofileña family agud mapasaka ang kaso.
Una na nga nakilala ang lalaki nga suspect nga nakuhaan sang CCTV sang ginkawat ang painting samtang alias pa lamang ang natumod sa kaupod sini nga babayi.
Nagalaom si Darroca nga makilala na ang identity sang ikaduha nga suspect sa ginapatigayon nga follow up investigation.
Nahibaluan nga matapos ginkawat sang Hulyo 3, ang painting ang ginbyahe tabok sa Iloilo antes gindala sa Metro Manila.
Madumduman nga nadakpan sa entrapment operation sang National Bureau of Investigation (NBI) sanday Ritz Chona Ching kag Donecio Somaylo, apang panindugan sang mga nga sila ang ginsugo lamang ni certain Atty Ching.
Pinaagi man kay Darroca ang paghatag sang reward money nga P25,000 nga gikan kay Silay City Mayor Joedith Gallego sa informant.
Ginapahayag nga may una na kuntani nga buyer ang painting sa Metro Manila apang ini ang nag-atras, gani liwat nagpangita sang buyer ang mga suspect kag gin-offer sa balor P3.5 million.
Ini ang ginreport sang informant matapos mahibaluan nga kinawatan ang painting, kag ang nagtransaksyon amo ang poseur buyer sang NBI.
