Pormal na nga ginpaidalom sa Comelec control ang banwa sang Moises Padilla, Negros Occidental kasunod sang serye sang election-related incidents nga nagresulta sa kamatayon sang duha ka mga konsehal kag anay punong barangay.
Kaina sang udto, gindeklarar ni Comelec Commissioner Antonio Kho, chairman sang Comelec control task force, ang pagpaidalom sa Moises Padilla sa kontrol sang poll body, kadungan sang iya pagpadulong sa amo nga banwa.
Kasunod ini sang resolusyon nga gin-aprubahan sang Comelec en banc kahapon.
Kadungan sini, gindeploy diri ang dugang nga mga suldado kag ginatos ka mga kapulisan.
Ginkakas man ang hepe kag tanan nga mga pulis sa Moises Padilla Municipal Police Station kag ginsaylo sa iban nga mga banwa.
Si Police Captain Junjie Liba ang ginbuslan ni Police Lieutenant Col. Adrian Acollador nga deputy director for administration sang Negros Occidental Police Provincial Office kag ginpatigayon man ang turn-over of command ceremony kaina.
Bangud tanan nga mga tikang sang militar kag pulis ang kinahanglan nga aprubahan sang Comelec, ginbutang ang provincial election supervisor sang Negros Occidental nga si Atty. Jessie Suarez bilang supervisor sa Moises Padilla.
Kaupod ni Commissioner Ko nga nagpadulong sa amo nga banwa si Commissioner Rowena Guanzon nga isa man ka Negrense kag mga opisyal sang PNP kag Philippine Army.
Suno kay Kho, wala sang pagbag-o sa mga opisyales sang Moises Padilla, magluwas lamang sa dugang nga mga checkpoint operation sa nagkalain-lain nga bahin sang banwa.
Personal man nga nagtawag si Commissioner Guanzon kay Mayor Magdaleno Peña kag ginpabutyag sini nga nagalaom siya nga kuntani mauntat na ang pinatyanay sa Moises Padilla rason nga gilayon nga nagpadulong sa police station ang alkalde.
Madumduman nga sadtong Marso 31, ginpatay si Councilor Jolomar Hilario sa ila nga balay sa Barangay Inolingan kag gin-ako sang New People’s Army ang krimen.
Abril 25, gin-ambush ang convoy ni Vice Mayor Ella Celestina Garcia-Yulo sa Barangay Inolingan kun sa diin napatay ang iya utod nga si anay punong barangay Mark Garcia kag hinablos nga si Councilor Michael Garcia.
