Ginhangkat ni former Silay City mayor Jose ‘Oti’ Montelibano ang iya kasumpong sa pagka-alkalde sang ciudad nga ipadakop ang mga persona nga yara sa ila drug list.
Ini matapos nga ginpabugal ni incumbent Silay City Mayor Mark Golez nga nagnubo ang numero sang krimen nga narekord sa amo nga ciudad sang siya ang nagapungko nga alkalde humalin sang tuig 2016 tubtub subong.
Suno kay Golez, 1 597 ang crime rate sang tuig 2016 apang sa karon, 571 nalang ang numero sang krimen bangud gintutukan ang pag-maintain sang peace and order.
Suno diri, high morale ang mga pulis sa Silay bangud wala siya sang business interest nga ginaproteksyunan.
Ginpanindugan naman ni Montelibano nga samtang nagadamo ang populasyon sang isa ka lugar, nagasaka man ang crime rate.
Ginpangitaan sini si Golez sang listahan sang ila mga nadakpan sang tinalikdan nga tinuig bangud may yara ini sang drug list.
Suno kay Montelibano, nalakip man siya sa amo nga listahan apang wala man sang nadakpan tubtub subong.
Gin-ukay man ni incumbent Silay City Mayor Mark Golez ang mga unliquidated finances sa peace and order program sang ciudad sang tiempo ni former mayor Jose ‘Oti’ Montelibano nga kasumpong niya sa karon sa pagka-alkalde sa 2019 midterm elections.
Sa Debate sa Bombo, ginpahayag ni Golez nga nagadangat sa 38 million pesos ang unliquidated funds ni Montelibano humalin sang January 2012 tubtub February 2015 nga amo man ang tiempo nga mataas ang crime rate sa Silay City.
Bangud sini, ginpasikto ni Golez si Montelibano kun sa diin sini gindala ang intelligence funds nga yara sa trial balance sang Commission on Audit.
Suno kay Golez, may yara siya sang mga papeles nga certified sang city accountant tuhoy diri.
Paathag naman ni Montelibano, na-liquidate na ang 38 million pesos kag ginahulat nalang ang notice nagikan sa COA nga nakakas na ini sa trial balance.
Suno sa anay alkalde, ginahulat lang nga mapadala ini sa city government apang indi gid malikawan nga ini ang madugayan.
Pagsabtanay nanday ex-mayor Jose Montelibano kag incumbent Mayor Mark Golez tuhoy sa unliquidated expenses sang Silay City.
