Ginkumpirmar sang Cadiz City Police Station nga may yara sang nagakatabo nga recruitment sang Moro National Liberation Front (MNLF) sa Barangay Tinampaan, ciudad sang Cadiz.
Sa interview sang Bombo Radyo kay Police Captain Gina Fernandez, Deputy Chief of Police sang Cadiz City Police Station, may gintukod nga base camp ang MNLF sa barangay Tinampaan samtang on the process ang ila compliance sa requirements sa permit sa pagpatindog sang ila camp sa area.
Suno diri, naga-pangrecruit sang miyembro ang MNLF sa mga luyag nga magtraining sa Mindanao apang wala naman ini sang may nabaton nga report nga may yara sang pagpang-into.
Pahayag ni Fernandez, wala naman sang threat sa area kasubong man sang kinagamo sa palibot.
Sa karun ginahulat pa ang pinal nga desisyon sang Local Government Unit angot sa permit sang MNLF sa pagtinir sa area.
Ginpa-untat naman ni Cadiz City Mayor ang pagpatukod sang MNLF sang ila imprastraktura bangod nga sila ang wala sang permit.
Sa interview sang Bombo Radyo kay Mayor Salvador Bading Escalante, ang mga MNLF ang gina-alegar nga may ginpabusong nga mga menor de edad sa ila anay nga lugar amo nga nagsaylo sila sa area sang Barangay Tinampaan, ciudad sang Cadiz.
Suno diri, madugay na nga yara didto ang MNLF kag nakaligad nga bulan sang gulpyada lang nga nanotisyaran nga nagdamo na sila kag nagpatindog pa sang cement structure kag nagbutang sang checkpoint.
Nagdesisyon ang alkalde nga padal-an sang Office of the Building Official ang area kag nahibaluan nga wala sang permit ang pagpatindog nila.
