Patay ang estudyante nga driver sang motorsiklo samtang pilason ang angkas sini matapos nga mabungguan sang salakyan sang 62nd Infantry Battalion sang Philippine Army sa Isabela, Miyerkules sang aga.
Sa interview sang Bombo Radyo Bacolod kay Police Major Hancel Lumandaz, Acting Chief of Police sang Isabela Municipal Police Station, nagasundanay ang military truck kag ang motorsiklo halin sa La Castellana padulong sa Isabela.
Nabungguan sang military truck ang motorsiklo nga ginamaneho ni Aljun Salibio, 22 anyos, residente sang Barangay Robles, La Castellana.
Bangud sa pilas sa ulo, ginbawian sang kabuhi si Salibio.
Ang iya angkas nga si Jayvie Tupas, 21 anyos ang nakaangkon naman sang madamo nga pilas kag ginabulong subong sa ospital.
Ang driver sang military truck ang ginkilala nga si Sergeant Jimmy Matteo Pangan.
Santo sa imbestigasyon, nadulaan sang preno ang military truck nga ginasakyan sang indi magnubo walo ka mga suldado.
Sanday Salibio kag Tupas ang padulong kuntani sa Central Philippines State University (CPSU) kun sa diin sila nagaeskwela.
May-ara naman sang inisyal nga pag-estoryahanay sa tunga sang pamilya sang biktima kag sang suldado nga driver.
Suno kay Lumandaz, ginahulat nalang ang affidavit of non-interest sang pamilya sang biktima kag matapos ang reglementary period agud nga makagwa na ang driver sang military truck sa prisohan.
