Patay ang driver sang motorsiklo matapos nga ginbungguan sang Suzuki carry nga salakyan sa National Highway of Purok Kapahuan 2, Barangay Sampinit, Bago City, Negros Occidental kaina sang aga, Enero 30, 2026.
Sa interview sang Bombo Radyo Bacolod kay Police Chief Master Sergeant Jeffrey Montinola, traffic investigator sang Bago City Police Station, ang imbulbado sa aksidente amo ang Suzuki carry kag isa ka motorsiklo.
Suno kay Montinola, ang carry nga salakyan ang halin sa Bacolod padulong sa ciudad sang Bago sang pagkalab-ot sa lugar sang insidente naglupok ang goma sang salakyan kag hinali lang nga nagtabok sa dalan rason nga nabungguan sini ang motorsiklo.
Ang driver sang salakyan ang ginkilala kay Mauro Ramos, 64 anyos, kasado kag residente sang Bonifacio Street, Barangay Poblacion, Bago City, Negros Occidental samtang ang motorsiklo ang ginamaneho ni
Nestie Gemotra ,48 anyos, kasado kag residente sang Purok Proper Cansi, Barangay Miranda, Pontevedra, Negros Occidental kag ang backrider sini ang ginkilala kay Feb Barluado, 21 anyos, single kag residente sang Barangay Manta-Angan,E.B. Magalona, Negros Occidental.
Bangud sa impact lunsay nakaagom sang samad ang duha ka driver kag ang isa ka backrider sa motorsiklo
Padayon nga ginadapatan ang pagbulong ang mga nasamaran samtang ang driver sang motorsiklo ang ginbawian sang kabuhi.
Wala pa man sang settlement sa tunga sang pamilya sang napatay kag ang driver sang salakyan bangud suno sa traffic investigator nga iplastar nalang anay ang biktima kag maestoryahanay pa sila kag pahibaluon lamang ini sang ila nga desisyon.
