Napasakaan na sang kaso ang lalaki nga nagpakuno-kuno nga pulis agud makapangilkil sa mga biktima sini.
Ang suspetsado ang ginkilala nga si John Patrick Calsado, 38 anyos, single kag residente sang Koronadal City, South Cotabato.
Sa interview sang Bombo Radyo Bacolod kay Police Lt Col. Antonio Benitez, pinuno sang City Drug Enforcement Unit, nagapakilala ini bilang “Police Major Calsado” nga miyembro sang CDEU.
Suno diri,may nagreport sa ila nga negosyante nga ginapangayoan sila sang kwarta ni Calsado kag nagapamahog kun indi sila maghatag.
Nagreklamo na ang mga biktima batok kay Calsado bangod wala na gid sila sang kwarta kag nabaligya naman nila ang ila salakyan para lang makabayad.
Natukiban nga may 16 ka transaction nga ginpatigayon kun sa diin nagdangat sa P700,000 tanan ang nakawat sini sa biktima.
Samtang, natabo pa nga may gin-akigan nga Police Non-Commissioned Officer si Calsado matapos nga wala ini nagsaludo sa iya.
Pahayag ni Benitez, nagdako sa South Cotabato si Calsado kag sang tinalikdan lang ini nagpadulong sa ciudad kag nagtinir sa isa ka hotel.
Ginmonitor sang kapulisan si Calsado tubtob nga nadakpan ini kag nakumpiskar ang mga IDs, logo sang pulis, armas-luthang kag ang salakyan nga ginarentahan sini.
Siya ginpasakaan sang kaso nga Robbery Extortion kag Usurpation of Authority.
