Nagagwa sa monitoring sang Bacolod Police Station 8 nga miyembro sang drug group sa ciudad sang San Carlos ang suspetsado nga nagpatay kay Adonis Matulac sa Lacson Extension, Barangay Singcang Airport kagab-i.
Sa interview sang Bombo Radyo kay Police Major Joery Puerto, station commander sang Bacolod Police Station 8, si Matulac ang nagakuha sang shabu sa person of interest apang small time pusher ukon street level individual lang ang classification sa iya.
Ang suspetsado naman ang ginakabig nga high value individual kag nagakuha ini sang supply sa drug group sa San Carlos City.
Suno kay Puerto, masobra isa na ka bulan ang pagmonitor nila sa nagpatay kay Matulac kag nagadistribute ini sang shabu sa bilog nga Bacolod.
Santo sa ila monitoring, ang mga pusher sa Singcang ang nagakadto sa San Carlos apang may mga tion man nga ang taga-San Carlos mismo ang nagapadulong sa Singcang agud idul-ong ang drug supply.
