Ginalantaw nga napabay-an nga cellphone nga naka-charge ang rason sa nagluntad nga sunog sa La Costa Brava Subdivision, Brgy Banago, ciudad sang Bacolod, kahapon, kapin alas-4:00 sang hapon.
Sa interview sang Bombo Radyo Bacolod kay Virginia Montes, tag-iya sang nasunog nga balay, nagapanilhig ini sa gwa sang balay sang may napanimahuan ini nga sunog.
Ini man ang ginhinambit sang ila timbang nga si Arlene Panganiban.
Suno diri, nagsulod si Panganiban sa balay para lantawon ang ginaluto sini apang wala didto nagikan ang baho.
Pagkadto sini sa kwarto, iya na lamang nakita nga may yara na sang kalayo sa sulod sang kwarto kag nagadamol ang aso.
Naghingagaw si Panganiban nga i-off ang main switch apang madasig ang paglapta sang kalayo.
Suno kay Montes, ang kwarto kun sa diin nag-umpisa ang sunog amo ang kwarto sang iya bata kag didto ginbilin sini ang iya cellphone nga naka-charge.
Samtang, suno naman sa timbang nga si Arlene Panganiban, walo na ka tuig nga nagatrabaho sa pamilya Montes, sang nakita sini nga nasunog na ang kwarto, nagsinggit ini nga may sunog kag gilayon nga ginapagwa ang mga kabataan.
Wala naman sang may nasamaran sa nagluntad nga sunog.
