Gin-pahanumduman sang national president sang Philippine Agricultural, Commercial and Industrial Workers Union -Trade Union Congress of the Philippines (PACIWU-TUCP) ang bag-o nga administrasyon sang Yanson Group of Bus Companies nga mapilitan sila nga mag-pasaka sang kaso kag notice of strike kun may termination kag harassment nga matabo sa ila mga empleyado.
Sa interview kay Hernane Braza, iya ginpahayag nga indi nila luyag magdangat sa strike ang problema nga gina-pangatubang sa subong bangud kun matabo ini, indi lang ang kompanya ang maapektuhan kundi pati man ang publiko.
Apang suno sa iya, kun mang-terminate ang bag-o nga administrasyon sa pag-pamuno sang bag-o nga presidente kag CEO nga si Roy Yanson (RVY), isa gid ini ka bayolasyon sa status quo bangud ang iya posisyon sa subong ang subject for final determination pa sa kaso nga yara subong sa korte, rason nga wala gid ini sang dibir nga mang-terminate sang empleyado.
Kun may yara man sang pwede makapang-terminate, maka-isyu sang memo kag direktiba suno kay Braza, si Leo Rey Yanson lang gid ini ang makahimo bangud siya sa gihapon ang legal nga presidente kag CEO sang Yanson Group of Bus Companies kag wala na sang iban pa.
Gina-pasiguro man sang PACIWU-TUCP nga ila gid apinan kag dampigan ang kinamatarong sang mga empleyado ilabi na sa subong nga wala naga-hangpanay ang mag-ululutod nga Yanson bangud lang sa pagdumala sang multi-billion transportation business sang ila pamilya.
Nahibaluan nga gin-pahayag man sang kampo ni Leo Rey kag Roy Yanson nga apisar sa away nila nga mag-ululutod, ila sa gihapon gina-pasalig nga indi maapektuhan ang publiko ilabi na ang ila mga empleyado.
