Gin-athag sang gobernador sang probinsya sang Negros Occidental nga may yara sang ordinansa nga nagadumili sa paggamit sang capitol lagoon para sa political ukon religious rally.
Sa interview sang Bombo Radyo kay Governor Eugenio Jose ‘Bong’ Lacson, sa rally kahapon natigayon nga mapalab-ot ang mensahe nga wala na nagakumporme ang mga tawo sa korapsyon kag dapat maggiyo na ang kongreso.
Suno diri, loud and clear na ang mensahe kag ginadayaw sini nga nangin malinong ang rally nga ginpangunahan sang simbahan.
Apang, masubo lamang para sa iya ang natabo sa Manila nga may malain na nga intensyon ang iban ilabi na ang mga kabataan.
Pahayag sang gobernador, ang Filipino indi kilala nga bayolente nga tawo.
Samtang, iya man gindayaw ang kapulisan nga nagpabilin nga kalmado kag wala gid sang may natabo nga may naglupok nga pusil apisar sa sitwasyon.
Gin-athag naman ni Lacson nga wala siya sang may nabaton nga pormal nga sulat nga naga-ayo nga gamiton ang capitol lagoon para sa pagtililipon.
Bangod sini, ginpasira niya ang lagoon agud indi magamit nga venue sang political kag religious rally kag nagmando nga gamiton na lang ang amo nga tion nga magpatigayon sang maintenance, kag subong nga adlaw bukas na ini.
