BACOLOD CITY — Tinguhaan sang Negrense boxer nga magdaog sa iya hampang subong nga adlaw kag madepensahan ang iya titulo sa flyweight division sa nagapadayon nga 2017 Southeast Asian (SEA) Games sa Kuala Lumpur, Malaysia.
Sa exclusive interview sang Bombo Radyo Bacolod kay Ian Clark Bautista, 22-anyos, tumandok sang Brgy. Payao sang banwa sang Binalbagan kag pambato sang Pilipinas sa 52 kilograms flyweight division, tinguhaan sini nga magdaog kontra Thailand sa hampang karun sa hapon sa semi-finals.
Suno kay Bautista, ihatag na niya ang bug-os nga masarangan agud nga mangin madinalag-on kag makaderetso sa finals kun sa diin posible nga atubangon sini ang magadaog sa tunga sang Singapore kag Indonesia.
Si Bautista ang may uyat sang titulo sa nasambit nga division sa 2015 SEA Games sa Singapore gani suno diri, iya gid tinguhaan nga depensahan ini.
Aminado si Bautista nga mabakod ang tanan nga kasumpong gani dapat nga dunganan sang pag pangamuyo ang away.
Bata pa lang si Bautista sang nagsugod ang pag palangga sa hampang nga boxing bangud nga boxing trainer ang iya amay kag masami ini nga nagaupod sa iya.
Ang unanimous win ni Bautista kontra kay Abdul Salam B. Kasim sang host country Malaysia tinalikdan nga Domingo ang nangin ticket sini padulong sa semi-finals.
Bug-os naman ang suporta sang banwa sang Binalbagan sa ila bugal nga si Bautista.
Suno kay Mayor Emmanuel Aranda, magapangamuyo sila para sa kadalag-an sang Negrense boxer.
May ginhatag man nga diutay nga suporta ang banwa para kay Bautista.
Ginpasalig man ni Mayor Aranda nga kun magpauli si Bautista, ila ini abi-abihon kag ilibot naman liwat sa banwa.
Nahisayran sa alkalde nga sa ciudad sang Himamaylan una nga nakilala si Bautista kag sang pagdaog sini sa boxing match sa ciudad sang Bacolod gindala ini sa Baguio agud mangin kabahin sang Philippine Team.
Ikaduha sa tatlo ka mag-ulutod si Ian Clark kag suno kay Mayor Aranda ang manghod sini nga si Jordan ang kabahin man sang national team.
Sang magdaog gani sa 2015 SEA Games sa Singapore wala nagbalik trabaho sa iban nga pungsod ang iya iloy.
Suno kay Aranda pigado man ang pangabuhi sang pamilya Bautista apang indi mapaktan, posible sa ulihi may mangin Nanay Dionesia ang Brgy. Payao, Binalbagan.
Suno man gani sa pahayag ni Ian Clark gina-idolo niya ang fighting senator Manny Pacquiao.
