Nagahingyo ang Negrense boxer sa mga taga Negros Occidental nga suportahan sila nga mga boksidor kag tanan nga delegado sang Pilipinas sa Southeast Asian Games.
Sa exclusive interview sang Bombo Radyo kay Ian Clark Bautista nga miyembro sang Philippine Navy bilang seaman second kag magasabak sa 56 kilogram bantamweight division, naghingyo ini sa mga taga Negros Occidental nga pangamuyuan ang mga delegado sang pungsod sa SEA Games.
Si Bautista ang tumandok sang Brgy. Payao, Binalbagan, Negros Occidental.
Suno sa boksidor, preparado na ini para sa iya nga hampang bangud nagligad nga bulan pa sila nagatraining kag may yara man sila sang ginrecruit nga Australian coach kag mga foreign boxers agud makasparring.
Isa sa preparasyon nga iya gina-ubra ang pagdiet bangud suno sa iya, kinahanglan niya nga mapanubuan ang iya timbang.
Sa kinaandan, nagabug-at si Bautista sang 59 tubtob 60 kilos.
Suno kay Bautista, pito ka tuig siya sang nagsugod ini sa boxing bangud ang iya nga amay ang isa man ka amateur boxer kag ginatudluan sila sini.
Tatlo sila ka mag-ulutod nga mga lalaki kag naga-intra sila sa mga interbarangay kag intercity competitions sadto.
Suno kay boksidor, sa Disyembre 4 pa mahibaluan kun sin-o ang iya nga kontra kag sa nasambit man nga adlaw masugod ang elimination samtang sa Disyembre 9 naman ang championship.
Ang Negrense pride ang nakakuha sang gold medal sa Felix Stamm Memorial Cup sa Warsaw, Poland kag bronze medals sa Thailand Open kag ASBC Asian Elite Championship sa Bangkok, Thailand sang nagligad nga tuig.
Naglupad na padulong sa Metro Manila ang pamilya sang boksidor nga si Ian Clark Bautista agud suportahan ang iya hampang sa Southeast Asian Games.
Sa interview sang Bombo Radyo sa iloy nga si Imelda Bautista sang Brgy. Payao, Binalbagan, Negros Occidental, bilog sila nga pamilya nga padulong sa Metro Manila sini nga hapon.
Kaupod sini ang iya bana nga si Mario kag duha ka mga kabataan.
Wala ginhimutig ni Mrs. Bautista ang iya kalipay sang ginbalitaan ni Clark sadto nga siya ang magatiglawas sang Pilipinas sa bantamweight division.
Suno sa iloy, wala nagkulang sa dedikasyon sa boxing ang iya ikaduha nga anak rason nga malab-ot sini ang iya nga handom.
Bangud mahiligon man sa sports si Mrs. Bautista, bug-os ang suporta sini sa 25 anyos nga anak.
Bata pa lang si Clark, suno sa iya, nagahampang na ini sa eskwelahan kag sa mga barangay competition kag nagapangayaw man sa iban nga barangay sa ngalan sa boxing kun sa diin nagatindog nga coach ang iya amay.
Nagpanawagan man ini sa mga taga-Negros Occidental ilabi na sa mga taga Binalbagan nga buligan paagi sa pagpangamuyo si Yan-yan.
