Wala nakahibalo ang pamilya sang 43-anyos nga negosyante nagikan sa Negros Occidental nga nagpaidalom ini sa liposuction sa Metro Manila kag napatay kasunod sang mga komplikasyon.
Sa pagbisita sang Bombo Radyo Bacolod sa balay ni Nory Bobadilla sa Villa Santa Maria, Barangay Sto. Rosario, Binalbagan, Negros Occidental, ginpahayag sang mga kabulig sini nga nagbiya ang ila amo sadtong Hulyo 3 sang kaagahon agud magpadulong sa Metro Manila.
Regular na ini nga hilikuton sang biktima bilang kabahin sang negosyo sang ila pamilya kag wala nakahibalo ang iya mister kag kabataan nga magakadto ini sa cosmetic clinic.
Nahibaluan nga nagpaidalom sa liposuction sa Contours Advanced Face and Body Sculpting Institute si Bobadilla sa pareho man nga adlaw.
Apang hinali lang ini nga nadulaan sang pangalibutan gani gindala sa Parañaque Doctors Hospital kag makaligad ang pila ka adlaw nga yara sa comatose, ginbawian ini sang kabuhi sang Hulyo 6.
Sa karon, yara na sa Manila ang mister sang biktima nga si Bern kag subang nga anak agud asikasuhon ang kaso sang duha ka mga doktor sa Contours clinic kag madala pauli ang bangkay sini.
Nagbalibad naman ang mga anak ni Bobadilla nga maghatag sang dugang pa nga statement bangud wala pa nahibaluan sang 7-anyos nga agot ang natabo sa ila iloy kag masami niya ini ginapangita.
