BACOLOD CITY — Gintapos na sang Negrense softball team nga tiglawas sang Asia-Pacific Region ang pagpasimpalad sa majors division ng Little League Softball World Series sa Estados Unidos.
Alas 12:00 kaina sang kaagahon, oras sa Pilipinas, apang alas 9:00 sang aga Agusto 16 sa Oregon, nagsabak sa pinakaulihi nila nga hampang ang Negros Occidental Little League sa Portland Oregon.
Nangin kasumpong sini ang Cedar City National Little League nagikan sa Cedar City, Utah, USA nga tiglawas sang West Region.
Natapos ang hampang pasado alas 2:00 kaina sang kaagahon sa score nga 2-1, pabor sa Cedar City National Little League.
Ini na ang ikaanom nga hampang sang Negrense softball team.
Bangud sang amo nga kalutusan, magapauli ang Philippine team nga uyat ang 1 win, 5 losses nga record.
Ang majors division sang Softball World Series ang ginapasakupan sang mga players nga naga-edad 11 tubtub 12 anyos kag ini ang ginpatigayon sa Portland Oregon USA humalin sang Agusto 9 tubtub subong nga adlaw.
Suno kay Coach Lizviminda Jalandoni, natalana na sila nga magbiya sa Portland, Oregon kag magaabot sila sa Bacolod Silay Airport sa Agusto 19, alas-6:00 sa aga.
