BACOLOD CITY – Dala ang paglaom nga makakuha sang pwesto sa Senior League Softball World Series, naglupad na kaina sang aga ang Negrense team padulong sa estado sang Delaware sa Estados Unidos.
Ang World Series ang patigayunon sa Hulyo 31 tubtub Agosto 6 sa Lower Sussex, Delaware kun sa diin 10 ka softball teams gikan sa nagkalain-lain nga rehiyon sa kalibutan ang maga-agaway sa kampeonato.
Ang senior league sang Pilipinas ang tiglawas sang Asia-Pacific region sa World Series matapos nagkampeon sa Senior League Softball Asia-Pacific Regional Tournament sa Singapore sang nagligad nga bulan.
Ang team nga naglupad kaina sang aga ginalakipan sang 12 ka softball players nga naga-edad 14 tubtub 16 nagikan sa nanari-sari nga bahin sang Negros Occidental kag tatlo ka mga coaches.
Sa ila nga pagbiya sa Ninoy Aquino International Airport, pangamuyo sang Philippine team nga makasulod sa bisan ano lang nga pwesto sa apat ka mga lugar sa torneyo.
Sa Agosto 2, atubangon sang Asia-Pacific ang team nagikan sa Manuabo, Puerto Rico nga tiglawas sang Latin America, las 5:30 sang hapon, oras sa Pilipinas.
Las 8:00 sang gab-i sa Agosto 2 gihapon, ila nga kontrahon ang team gikan sa Haverstraw, New York nga tiglawas sang East region.
Sa Agosto 3, liwat nga magabalik sa softball field ang Pilipinas batok sa team gikan sa Vidalia, Louisiana nga nagadala sang pangalan sang Southwest region.
Sa Agosto 4, may match naman ang Asia-Pacific region batok sa host team nga Delaware District III.
Samtang, magabiya man sa Agosto 7 ang little league sang Negros Occidental nga tiglawas man sang rehiyon sa Little League Softball World Series nga patigayunon sa Portland, Oregon, USA sa Agosto 9 tubtub 16.
