Ginahandaan na sang provincial government sang Negros Occidental ang pagdugok sang masobra 20 mil ka mga delegado nga magapasakop sa Palarong Pambansa 2021.
Ini ang kasunod sang pagdaog sang probinsya sa bidding nga mangin host sang pinakadako nga hinampang sa pungsod.
Suno kay Karen Dinsay, Public Information Officer sang Capitol, diutay nalang ang mga pasilidad nga kinahanglan irepair agud mangin handa sa hinampang.
Sa karon, may yara na sang pondo ang pagpakaayo sang rubberized track oval sa Panaad Park and Stadium nga amo man ang gamiton sa Western Visayas Regional Athletic Association Meet 2020.
Suno kay Dinsay, ang hosting sang Palarong Pambansa ang may maayo nga epekto sa ekonomiya sang Bacolod kag iban nga playing venues bangud madamo ang magatinir sa mga hotel kag may income man ang mga manugbaligya sa Bacolod, Talisay, Silay kag Bago.
Ini na ang ikaanom nga paghost sang Negros Occidental kag Bacolod sang Palaro kasunod sang 1971, 1974, 1979, 1998, kag 2000.
Bangud sini, nakuha sang probinsya ang rekord sa may pinakamadamo nga beses sang paghost sang dako nga hinampang.
