Nagdangat sa kapin 6000 ka mga indibidwal ang natukiban sang Negros Electric Power Corporation (NEPC) nga nagapangawat sang kuryente kasunod sang ginpatigayon nila nga meter mapping kaupod ang Central Negros Electric Cooperative ukon CENECO.
Sa interview sang Bombo Radyo Bacolod kay Jonathan Cabrera, spokesperson sang Negros Electric Power Corporation (NEPC), indi na malipod kag manegar nga nakahibalo ang publiko nga madamo sang mga nagapangawat sang kuryente ukon jumper.
Suno kay Cabrera, ang pila sa mga ini ang hungod nga nagapangawat samtang ang iban naman ang wala na sang choice bangud ang mga ini ang nabudlayan nga mag-apply agud matakdan sang kaugalingon nga kuntador bangud man sa rekisitos.
Bangud sa ila natukiban, ang NEPC ang mahatag sang isa ka bulan nga amnestiya agud nga mabuligan ang kutob sa may luyag nga makaangkon sang kaugalingon nga kuntador nga maka-apply agud matakdan agud nga malikawan na ang illegal connection sa kuryente.
Suno kay Cabrera, ang illegal connection ukon jumper sang kuryente ang may yara sang criminal liability kag kun mapamatbatan sang korte nga guilty, mahimo mapriso sang anum ka bulan tubtob 12 ka tuig.
Samtang ang piyansa ang nagdangat sa P90 mil tubtob P120mil kag magluwas diri, computan pa ang mga ini sang electrical distributor sang ila differential billing ukon ano na kadugay ang mga ini nagaillegal connection kag ang illegal connection ang systems loss sang CENECO.
Target sang NEPC nga makaumpisa sa pag-operate sa una nga quarter sang Agosto.
