BACOLOD CITY – Nagaduda si Department of Interior and Local Government (DILG) Secretary Ismael “Mike” Sueno nga wala na nagapamati ang mga hangaway sang Communist Party of the Philippines – New People’s Army – National Democratic Front (CPP-NPA-NDF) sa matag-as nila nga mga opisyales.
Sa interview sang Bombo Radyo Bacolod ginpahayag ni Secretary Sueno nga nagapangduha-duha na ini kun nagapamati pa sa matag-as nga opisyales sang komunista nga grupo ang ila mga hangaway sa bukid bangud nagapadayon sila sa paghimo sang kalakasan sa pihak sang unilateral ceasefire.
Suno sa tiglikom, kaangay nga ginapanginpuslan sang mga rebelde ang ginpatigayon nga peace talks kag gindeklarar nga ceasefire sang gobyerno.
Bngud sini, nagapabor si Secretary Sueno sa ginhimo ni Presidente Rodrigo Duterte nga batakon ang unilateral ceasfire kag magbalik sa paglunsyar sang opensiba ang mga suldado sang gobyerno kontra sa CPP-NPA-NDF.
Suno kay Sueno, mahimo nga natak-an na si Presidente Duterte bangud sa pihak sang mga pabor nga ginyatag sini sa Komunista, madamo sa gihapon sang demands ang mga ini kag nagapakatig-a nga magdihon sang bilateral ceasefire sa gobyerno.
